مهم لكل طالب جامعي

ركز أوي و اقرأ بتمعن شديد , الكلام اللي جي مهم جداً و هيشقلب حياتك كلها

عزيزي طالب الجامعة، اللي اتخرج أو اللي في آخر سنة بكالوريوس أو اللي لسه في بداية حياته الجامعية عشان ياخد باله من كم نقطة مهمة !!

-خاب وخسر، خاب وخسر، خاب وخسر اللي دخل الكلية وخرج منها و مفيش في جيبه غير التقدير ، لا بيعرف لغة ولا طور قاعدته المعرفية بالقراءة، ولا كون شبكة علاقات تساعده علي ايجاد وظيفة..

هتعاني أشد المعاناة في حياتك، وهتضطر تقبل بوظائف مرتباتها باهتة، وعدد ساعات عملها قاسية، ده إن لقيتها من الأساس..

فاستعد نفسيًا لتلقي صدمات بعمرك كله في أول شهور ما بعد التخرج.. هتدفع ثمن الوقت اللي أهدرته في الجامعة علي الفاضي..

-انسى اسم الكلية بتاعتك خالص.. سوق العمل مالوش في الشهادات مُطلقاً, اسم كليتك وشهادتك كانوا مفيدين لماما وبابا وهما بيتفشخروا بيك قدام طنط ليلي وعمو رجائي..

لكن في السوق هتلاقي شاب خريج تجارة اتنحرش وخد كام دبلومة وعرف يظبط أكسنت انجليزي وخلع يشتغل في الخليج وبياخد مرتب كويس، وشاب خريج تربية ألماني بيشتغل في مدرسة في قطر بكام الف ريال..

ارمي شهادتك علي عتبة الكلية ،واعرف أن الرزق مالوش دعوة بمؤهل، له دعوة بتطوير قدرات تخليك تنافس علي 100 مكان..

- ادي لنفسك فرصة للتفكير بعد التخرج.. هل لازم أشتغل في المجال اللي بترسمه شهادتي الجامعية؟ ولا في شيء تاني ممكن أعمله أو هواية بحبها وعايز أعافر فيها لغاية ما تبقي مهنة..

اسأل نفسك مليون مرة عن مكانك بعد 20 سنة، عن شغفك، وعن الحاجة اللي هتقوم تعملها بنفس كل يوم..

حدد أنت عايز ايه من الدنيا بعد التخرج و اسعى فيه.. بدل ما تبدأ سكة طويلة وتيجي في منتصف الطريق وتسأل نفسك أنا فين؟ وبعمل ايه؟ و إيه اللي مشاني السكة دي؟،وهنا مفيش غير طريقين، يا إما تغير الكارير وده ثمنه عسير، يا إما تكمل بقية حياتك في بؤس، وتعيش عشان تاكل وتشرب وتربي العيلين..

-اوعي تتنك علي الشغل.. كل حاجة في الكون لها بداية، مش عيب خالص لو بدأت من حاجة متواضعة وفي غير تخصصك، لأن قدراتك أقل من وظيفة أحلامك, بس العيب أنك تقف عند الخطوة دي وتقضي فيها بقية حياتك، بدل ما تعتبرها مرحلة انتقالية تتطور فيها نفسك وتروح مكان أفضل..

والعيب الأكبر أنك تقول مش لاعب أصلًا.. وتقعد تستني وظيفة أحلامك لغاية ما تجيلك.. ابقي قابلني لو لمحتها..

ناس مشاهير كتير بدأوا من مكان ما.. يوشكا فيشر وزير خارجية ألمانيا السابق كان سواق تاكسي، ميركل كانت بتخدم علي زباين في مطعم، بيل جيتس Bill Gates ترك تعليمه الجامعي مع بداية عصر الكمبيوتر والبرمجيات وقرر التفرغ للعمل الحر واستغل موهبته في البرمجة وقرر وهو عنده 19 سنة إنشاء شركته الخاصة للبرمجيات (مايكروسوفت) وكان بـيـبـيـع لعمالقة شركات الكمبيوتر زي IBM ودلوقتي شركته من أكبر الشركات في العالم و أصبح هو نفسه أغنى شخص في العالم, وغيرهم كتير زي ستيف جوبز Steve Jobs ( https://goo.gl/r8q1Bv )و إليزابيث هولمز ( https://goo.gl/Fwkij5 )

-الحياة مش عادلة، والدنيا مبتديش للناس اللي يستحقوه..تؤ تؤ.. ده كلام يبرر به العاجزون عجزهم علي أنغام دايمًا دموع لحمادة هلال، وآخرته قطر الحياة هيفوتك والناس هتكون ركبت صواريخ وحققت أحلامها..

مشوفتش واحد من أول ما اتخرجت تعب وعمل كل اللي عليه، و ربنا خذله وضيع تعبه.. وكلهم كانوا أقل منك في الظروف وشافوا المر ألوان.. ودلوقتي في مراكز بحثية من ميونخ لبون لبرلين، و متنطورين على مقاعد الجامعات في كل ركن في الكوكب، واللي قرر فيهم يقعد في مصر خد وظيفة أحلامه..

-حذار من دوامة الأوهام.. في ناس بتترعب من مواجهة بُكره.. وبدل ما تشيل الرعب من قلبها وتقوم تشوف بكره عايز ايه..بتأجل المواجهة..

في اللي بيعشم نفسه بالسفر وهو غير مؤهل ويمشي السكة ويلاقي المحصلة صفر..

و في اللي بيدخل يكمل دراسات عليا لمجرد انه يبقي بيعمل حاجة تنفي عنه صفة البطالة.. وسكك تانية كتير..

بس مش هتفوق غير لما تلاقي سكينة العمر سرقتك، و إن اللي أجلت مواجهته في سن 21، مضطر تواجهه تاني في سن 27 وما فوق..

وهنا ثمن الرجوع بيبقي صعب فوق ما عقلك يتخيل، ومحتاج إنسان جبار يقدر يدخل نفسه دوامة الحياة من جديد، وتوفيق لا يتوافر للكل...

-لا تُقيد نفسك بارتباط عاطفي أو التزام أسري ونت بتقول يا هادي..

ثقافة الارتباط ((المُبكر)) في مصر قائمة علي التسبيل وسماع الأغاني وامتلاك كل واحد للتاني والتدخل في أدق تفاصيل الحياة الشخصية بشكل مقيت ..

حاجة بتخلي الطرفين يجيبوا بعض ورا، بدل ما يشدوا بعض لقدام.. فلا أنت بنيت علاقة سليمة، ولا تقدمت في مجالك الوظيفي..

مجرد خصم من مجهود انت محتاج كل نقطة فيه في بداية حياتك..

ثبت نفسك في شغلك، اقف علي أرض صلبة وفكر في موضوع الارتباط وأنت أكثر نضوجًا..

-الحتة دي مهمة جداً وهي للي لسه مازالوا طلبة ..

لازم حضرتك تشيل من دماغك فكرة = الجامعة للهلس, كتير من طلبة الثانوية العامة خاصة البنات أو طلبة الارياف (انا من الفلاحين عشان محدش يفتكرها شتيمة) بيقوا راسمين فى دماغهم طوال حياتهم إن الجامعة الحلم المنتظر مش عشان التعليم قد ما هو مكان للهلس والمز زي مابيشوفوا في الافلام

وهى الجامعة للاسف مش بس مكان للهلس لا دا بتجيبلك الهلس ديلفرى, فحابب اقول بخلاف الحلال والحرام , ان الطريق دا هو الطريق الرسمي للفشل وفجأة هتلاقي نفسك شايل مواد ومستقبلك بيضيع وحياتك فى طريق مكنـتش تتمناه.

من اليوم الأول لحضرتك فى الجامعة لازم تحط لنفسك هدف تعليمى معين ! لازم يكون لك هدف وتشتغل عليه من أول يوم فى الكلية عشان تقيس وتحدد مدى نجاحك من عدمه , واعرف ان للاسف البهائم فقط اللى بتعيش من غير هدف

في خلال دراستك هتقابلك منح ودورات وكورسات وفعاليات مفيدة لمجال دراستك = اوعى تسيبها ! , أي دورة أو كورس أو منحة أو فعالية فى مجال تخصصك أو دراستك أو هتفيدك في مجالك العملي مستقبلاً, أضعف الايمان هتكتبها فى ال CV بتاع حضرتك بعد التخرج.

- تابع الـ Events أو المؤتمرات والمعارض الدولية ومعارض التوظيف اللي بتعملها الشركات العالمية العاملة في مصر و احرص على حضورها, هتستفيد منها جداً

>> هتكون منها شبكة علاقات هتفيدك

>> وهتشوف ناس أددك في السن لكن قدروا يعملوا حاجات كتير.. هيدوك الدافع والحافز إنك تعمل زيهم وتنافسهم..

>> وهتعرف إيه الكورسات والشهادات الدولية المطلوبة منك عشان سوق العمل...

>> لو إنت تخصصك طب على سبيل المثال هتلاقي في مؤتمرات سنوية عن أحدث تقنيات علاج القلب أو اختراع جديد في طب الأسنان وهكذا... المؤتمرات دي هتفيدك جداً وهتخليك (updated) على طول لكل حاجة جديدة في مجالك وفوق كده ممكن تضيفها في الـ C.V بتاعتك وهتنفعك جامد في فرص العمل لأنها بتعني للشركات إنك انسان متابع ومواكب لكل جديد في مجالك وهتفيد المكان اللي هتشتغل فيه

>> ممكن تطلع بأفكار بحثية تساعدك على مواصلة دراساتك العليا (ماجستير, دكتوراه)

>> ممكن تحصل على منح مجانية في مجالك للتدريب

اقرأ المزيد عن الفوائد الهايلة لحضورك المؤتمرات

http://goo.gl/YyhbD9 (ملف Word)

http://goo.gl/2eK4v9

http://goo.gl/SYZy6Y

دليل المعارض الدولية في القاهرة

http://goo.gl/0f5u4C

-أخيرًا.. مش بأحب أنصح ولا أعيش في دور الواعظة الحكيمة ..

بس علي مدار ال 5 سنوات الماضية شوفت خريجين كتير كانوا عارفين هما عايزين ايه وتعبوا عشان يعملوا حاجة، ودلوقتي رجلهم علي أول طريق أحلامهم..

وخريجين أكتر تكاسلوا، فتعثروا، فتاهوا، فسرقتهم سكينة العمر.. وكل أمنياتي انك متبقاش واحد من المتعثرين والتائهين..

شعور قاسي بمجرد أنك تسمع قصصهم وتشوف ملامح الخيبة علي وجوههم ووجوه محبيهم. ما بالك بإحساسهم همَّ.. وما بالك لو كنت واحد منهم..

آخر فترات الراحة في عمرك كله هتنتهي مع آخر امتحان جامعي. والقادم صعب, حياة بمعني الكلمة هتقف فيها أعزل من كل شئ إلا من علمك ومجهودك..

كُن مستعد بكل ما تملك.. كل تخبط، وتسويف واستهانة ثمنهم عمر بيضيع ووقت مش هتعوضه بمال الدنيا.!!

مقتبس من Abdo Fayed

https://www.facebook.com/profile.php?id=100009436133419

https://www.facebook.com/1fullmark/posts/1605622936367053

▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂▂

#كل_ما_يتعلق_بالـCV

بمشاركة المهندس Hatem Hussein

١) بتبعت على شغل ومحدش بيرد عليك؟؟